2025-жылдын 21-апрелинде Казакстандын Президенти Касым-Жомарт Токаев менен Түркмөнстандын Элдик Маслахатиясынын Төрагасы Гурбангулы Бердымухамедов Түркстандын Визит борборуна барышты.

Урматтуу конокторго байыркы Күлтөбе конушун өнүктүрүү боюнча долбоорлор тууралуу маалымат берилди. Алар 27 гектар аянтка археологиялык казуу иштери аяктаган тарыхый жайды музейлештирүү иштеринин жүрүшү менен таанышты. Ошондой эле усталар борборунун концепциясы көрсөтүлдү, анда устаканалар, улуттук гастрономиялык борборлор, чыгыш базары жана мейманканалар пайда болот.

Белгилей кетсек, 25-мартта Түркстанга World Craft Council эл аралык уюмунун чечими менен “Усталар шаары” статусу берилген.

Мындан тышкары, Токаев менен Бердымухамедовго Хожа Ахмед Ясауинин мавзолейинен уникалдуу тарыхый экспонаттар көрсөтүлдү.

Сүрөт: Ачык булактар