Тегеран шаарында Кыргыз Республикасы менен Иран Ислам Республикасынын биргелешкен өкмөттөр аралык комиссиясынын жыйынынын алкагында Кыргыз Республикасынын экономика жана коммерция министри Бакыт Сыдыков менен Ирандын Улуттук өнүктүрүү фондунун президенти Махди Газанфари сүйлөшүүлөрдү өткөрдү.
Жолугушуунун жыйынтыгында эки өлкөнүн ортосундагы биргелешкен инвестициялык комитеттин аткаруучу негизин түзүүгө багытталган өз ара түшүнүшүү жөнүндө алкактык меморандумга кол коюлду.
Министр Иран-Кыргызстан инвестициялык кеңсесинин тез арада ишке киришинин маанилүүлүгүн белгилеп, анын өнөр жай, энергетика, инфраструктура жана Кыргызстандын экономикасынын башка негизги тармактарына ирандык инвестицияларды тартуудагы ролун белгиледи.
Кол коюлган Меморандумда Ирандын Улуттук өнүктүрүү фонду тарабынан 50 миллион евро өлчөмүндө кредиттик линия берүү каралган. Каражат Ирандын техникалык жана инженердик кызматтарын Кыргыз Республикасына экспорттоону колдоого жумшалат.
Тараптар жетишилген макулдашуулар эки тараптуу экономикалык байланыштарды тереңдетүүгө жана соода жүгүртүүнү көбөйтүүгө негиз болооруна ишеним билдирди.