Бүгүн, 28-апрелде Кыргыз Республикасынын Президенти Садыр Жапаров Катар Мамлекетинин Улуттук Олимпиада комитетинин президенти Йохан бин Хамад Аль-Таниди кабыл алды.

Президенттин басма сөз кызматы билдиргендей, анда спорт тармагындагы кыргыз-катар кызматташтыгын өнүктүрүүнүн актуалдуу маселелери, анын ичинде олимпиадалык кыймылды илгерилетүү жана спорттук инфраструктураны чыңдоо талкууланды.

Садыр Жапаров Катар мамлекети ири спорттук иш-чараларды өткөрүүдө чоң тажрыйба топтоп, спорттук инфраструктураны өнүктүрүүдө жана ири объектилерди курууда чоң ийгиликтерге жетишкенин канааттануу менен белгиледи.

Бул контекстте мамлекет башчы Кыргызстанда олимпиадалык бассейн, бокс академиясы жана Улуттук олимпиада комитетинин жаңы имараты сыяктуу заманбап спорттук объектилерди куруу үчүн Катардын тажрыйбасын жана инвестициясын тартуу мүмкүнчүлүгүн карап чыгууну сунуштады.

Катар Улуттук Олимпиада комитетинин президенти Жоан бин Хамад Аль Тани өз кезегинде Кыргызстан менен кызматташууну өнүктүрүүгө кызыкдар экенин билдирип, эки өлкөнүн спорттук байланыштарын чыңдоого багытталган сунуштарды кароого даяр экенин белгиледи.

Шериктештикти мындан ары кеңейтүүнүн алкагында катар тарап Кыргызстанда жалпы билим берүүчү мектептерде сууда сүзүүнү өнүктүрүү боюнча долбоорду ишке ашырууну да сунуштады.

Жолугушуунун соңунда тараптар спорт тармагындагы кызматташтыкты өнүктүрүү Кыргызстан менен Катардын ортосундагы достук мамилени чыңдоого өбөлгө болоруна ишеним билдирди.