Евразия экономикалык биримдигиндеги (ЕАЭБ) интеграциялык процесстер коңшулаш аймактарга, анын ичинде Борбордук Азияга оң таасирин тийгизүүдө. Бул тууралуу Евразия экономикалык комиссиясынын (ЕЭК) экономика жана каржы саясаты боюнча министри Бахыт Султанов билдирди., ЭСКАТОнун Бангкоктогу сессиясында чыгып суйледу.

Султанов ЕАЭБ товарлардын, кызмат көрсөтүүлөрдүн, капиталдын жана жумушчу күчтөрдүн эркин кыймылын камсыз кылуу, инвестициялык кызматташтыкты өнүктүрүү жана эффективдүү транспорттук-логистикалык тармакты түзүү аркылуу Евразия аймагынын туруктуу өнүгүүсүнө көмөктөшөөрүн баса белгиледи.

Сессиянын жүрүшүндө Бахыт Султанов БУУнун Башкы катчысынын орун басары жана ЭСКАТОнун аткаруучу катчысы Армида Салсиах Алисжахбана менен жолугушту., анда Туруктуу өнүктүрүү максаттарынын алкагында кызматташуу маселелери талкууланды. БУУнун Башкы катчысынын орун басары ЭСКАТОнун ЕЭК жана ЕАЭБ өлкөлөрү менен кызматташууну кеңейтүүгө кызыкдар экенин билдирди.

Тараптар заманбап чакырыктарды жеңүү жана глобалдык өзгөрүүлөргө ыңгайлашуу үчүн кызматташууну активдештирүүнүн маанилүүлүгүн белгилешти. ЕЭК жана ЭСКАТО өнөктөштүктүн жаңыланган артыкчылыктарын жана милдеттерин камтыган жаңы өз ара түшүнүшүү меморандумуна кол коюуга даярданып жатышат.