Бишкек шаарынын мэриясынын дене тарбия жана спорт, туризм жана жаштар иштери боюнча башкармалыгы Эл аралык инновациялык технологиялар университети жана Бишкек шаарынын мэриясынын билим берүү башкармалыгы менен биргеликте үчүнчү жолу жыл сайын өтүүчү “ЭКО кубогу-2025” мелдешин өткөрүүдө.

“ЭКО Кубогу” – бул жаштардын көңүлүн экологиялык көйгөйлөргө бурууга жана экологиялык көйгөйлөрдү активдүү талкуулоону өнүктүрүүгө багытталган жыл сайын өткөрүлүүчү иш-чара.

Сынактын максаты мектеп окуучуларын, студенттерди, магистранттарды, аспиранттарды, жаш окумуштууларды жана коомдук ишмерлерди курч экологиялык көйгөйлөрдү чечүүгө багытталган илимий-изилдөө иштерине тартуу болуп саналат.

Быйылкы жылы Бишкек шаарындагы жалпы билим берүүчү мектептерден жана орто кесиптик билим берүү мекемелеринен 15 команда ЭКО кубогу-2025ке катышууга арызын тапшырып, сынактын алкагында ар бир команда өз алдынча экологиялык акция уюштуруп, булганган аймакты тандап, тазалоо иштерин жүргүзүштү.

2025-жылдын 21-апрелинде катышуучулар экология боюнча ар кандай татаалдыктагы 30 суроодон турган жеке онлайн тестти тапшырышты. Команданын бардык мүчөлөрү тестирлөөдөн ийгиликтүү өтүштү.

Кошумчалай кетсек, командалар чүчүкулак аркылуу темалары аныкталган долбоорлордун үстүндө иштешип, «Көк-Арча» темасында видеороликтерди даярдашат. Долбоорлордун акыркы коргоосу сынактын финалдык этабында өтүп, анын жыйынтыгы менен 2025-жылдагы ЭКО Кубогунун жеңүүчүлөрү аныкталат.

Жыйынтыктар чыгарылып, катышуучуларга сыйлыктар 2025-жылдын май айында тапшырылат.