Өзбекстан астанасында Өзбекстан Республикасының Жоғары білім, ғылым және инновациялар министрлігі мен Инновациялық даму агенттігінің ұйымдастыруымен ТМД Атқару комитетінің қолдауымен ТМД елдерінің тұңғыш Инновациялық даму форумы өтті.

Форумға ТМД Бас хатшысының орынбасары Денис Трефилов бастаған ТМД Атқару комитетінің делегациясы қатысты., Өзбекстан тарапына шараны жоғары деңгейде ұйымдастырғаны үшін алғысын білдірді. Ол форумды Ғылыми-техникалық және инновациялық салалардағы ынтымақтастық жөніндегі мемлекетаралық кеңестің отырысымен бірге өткізу бірлескен практикалық шешімдерді әзірлеу үшін бірегей алаң туғызатынын атап өтті.

Трефилов жаһандық технологиялық сын-қатерлер жағдайында ТМД елдерінің ғылыми-техникалық егемендігін қамтамасыз ету қажеттілігіне назар аударып, осы салалардағы ынтымақтастықтың стратегиялық маңыздылығын атап өтті. Сондай-ақ ол Достастық аясында ғылыми-техникалық және инновациялық салалардағы әріптестікті дамыту үшін қолайлы жағдайлар мен елеулі әлеуеттің бар екенін атап өтті.

ТМД Бас хатшысының орынбасары форумды жүйелі түрде өткізу тұрақты диалогқа мүмкіндік береді және бірлескен жобалар мен бастамаларды жүзеге асыру үшін берік негіз жасайды деп үміттенетінін айтты.

ТМД инновациялық даму форумының негізгі мақсаты аймақтағы технологиялық жетістіктерді, экономикалық өсуді және трансшекаралық серіктестікті нығайту үшін бірлескен ортаны құруға жәрдемдесу болып табылады.

Іс-шара ТМД елдеріндегі ғылыми-техникалық және инновациялық бастамаларды қолдауға, бірлескен жобаларды жүзеге асыру үшін тиімді алаң құруға, ғылыми ұйымдар арасындағы ынтымақтастықты нығайтуға және технологиялар трансферті мен коммерцияландыру саласындағы мемлекеттік-жекеменшік әріптестікті ынталандыруға бағытталған.

Форумға қатысушылар заманауи технологияларды дамытудың өзекті мәселелерін және перспективалы инновациялық жобаларды ілгерілету және коммерцияландыру бойынша ТМД-ға қатысушы мемлекеттердің инновациялық ынтымақтастығы мемлекетаралық бағдарламасының перспективаларын талқылады.