O‘zbekiston va Vengriya iqtisodiyotning muhim tarmoqlarida hamkorlikni faollashtirish niyatida. O‘zbekiston Respublikasi Investitsiyalar, sanoat va savdo vazirligining ishchi guruhi 7-8 may kunlari Vengriyada bo‘lib, davlat organlari va tadbirkorlik subyektlari vakillari bilan uchrashuvlar o‘tkazdi.

Tashrif davomida asosiy e’tibor savdo-iqtisodiy va sarmoyaviy sheriklik munosabatlarini mustahkamlash, hamkorlikning yangi istiqbolli yo‘nalishlarini belgilash va avval erishilgan kelishuvlarni amalga oshirishga qaratildi.

Tomonlar sanoat, energetika, qishloq xo‘jaligi, logistika va farmatsevtika kabi strategik muhim tarmoqlarda qo‘shma loyihalar ishlab chiqishga kelishib oldilar. Qo‘shma korxonalarni rivojlantirish va O‘zbekiston loyihalariga Vengriya sarmoyalarini jalb etishga alohida e’tibor qaratildi.

Tashrif yakunlari boʻyicha Oʻzbekiston va Vengriya oʻrtasidagi strategik sheriklikni yanada chuqurlashtirishga qaratilgan yangi ikki tomonlama shartnomalarni tayyorlash va imzolash uchun asos yaratildi. Ushbu kelishuvlar ikki davlat o‘rtasidagi iqtisodiy hamkorlikni kengaytirish va aloqalarni mustahkamlashga xizmat qilishi kutilmoqda.