Астана, 2025 жылғы 13 мамыр – «Караван Инфо» ақпараттық агенттігі.Абу-Даби тақ мұрагері шейх Халед бен Мұхаммед бен Заид Әл Нахаянның Астанаға ресми сапары барысында құқықтық саладағы ынтымақтастықты нығайтуға бағытталған маңызды екіжақты құжатқа қол қойылды. Қазақстан Республикасының Әділет министрі Ерлан Сәрсембаев пен Біріккен Араб Әмірліктерінің Әділет министрі Абдулла бен Сұлтан бен Авад Әл-Нуаими екі елдің Әділет министрліктері арасындағы ынтымақтастық туралы меморандумға қол қойды.

Қол қойылған Меморандум Қазақстан мен Біріккен Араб Әмірліктері арасындағы әділет саласындағы ынтымақтастықтың негізгі бағыттарын айқындайды. Құжат халық арасында құқықтық ақпаратты тарату, сот сараптамасын жүргізу, нормашығармашылық қызметті жетілдіру, адвокаттық қызмет институтын реттеу және тиісті бөлімдердің жұмысына заманауи ақпараттық технологияларды белсенді енгізу сияқты маңызды салалардағы ынтымақтастықты орнатуға және дамытуға бағытталған.

Фото:Қазақстан Республикасы Әділет министрлігі