2025-жылдын 16-майында Кыргыз Республикасынын Эмгек, социалдык коргоо жана миграция министрлиги менен “Кыргызстандын SOS Балдар Айылдары” коомдук фондунун ортосунда өз ара түшүнүшүү жөнүндө меморандумга кол коюлган. Документтин максаты турмуштук оор кырдаалга кабылган балдардын укуктарын коргоо, ошондой эле социалдык жетимдиктин алдын алуу жаатында туруктуу жана системалуу өнөктөштүктү өнүктүрүү болуп саналат.

Тараптар төмөнкүдөй багыттар боюнча демилгелерди биргелешип ишке ашырууга макулдашышты:

үй-бүлөлүк чөйрөгө мүмкүн болушунча жакын камкордук көрүүнүн альтернативдүү формаларын өнүктүрүү;

үй-бүлөлөрдү чыңдоо жана балдардын биологиялык ата-энесинен ажырап калуусуна жол бербөө боюнча программаларды ишке ашыруу, балдарды коргоо тармагында иштеген адистерди тажрыйба алмашуу жана квалификациясын жогорулатуу, камкордукка алуу тутумунан чыгып жаткан жаштарды колдоо, балдарга карата зомбулуктун алдын алуу жана тез жардам көрсөтүү маселелеринде өз ара аракеттенүү.

КР Эмгек, социалдык коргоо жана миграция министри Равшанбек Сабиров фонд менен кызматташуунун маанилүүлүгүн баса белгиледи:

«Биз SOS Кыргызстан Балдар Айылдарынын узак мөөнөттүү ишин жогору баалайбыз. Кол коюлган меморандум биздин өлкөдө балдарды коргоонун натыйжалуу системасын куруунун жаңы этабы болот деп ишенем».

«Кыргызстандын SOS Балдар Айылдары» коомдук фонду өлкөдө 1996-жылдан бери иштеп келе жатат жана ата-энесинин камкордугусуз калган балдарга, ошондой эле кризистик кырдаалга кабылган үй-бүлөлөргө колдоо көрсөтүп келет. Фонддун программалары республика боюнча 1800дөн ашык балдарды жана ата-энелерди камтыйт. Бишкек жана Чолпон-Ата шаарларында балдар айылдары, жаштар үйлөрү, үй-бүлөнү чыңдоо программалары жана фостердик үй-бүлөлөр бар.

Кол коюлган меморандум ар бир бала үчүн коопсуз, туруктуу жана камкор чөйрөнү түзүүгө багытталган кызматташтыкты кеңейтүүгө жана тереңдетүүгө эки тараптын каалоосун ырастайт.