Qirg‘izistonning O‘zbekistondagi elchisi Duyhonqul Cho‘tonov O‘zbekiston Oliy Majlisi Senati Raisi Tanzila Narboyeva bilan uchrashdi. Bu haqda Qirg‘iziston Tashqi ishlar vazirligi matbuot xizmati xabar berdi.

Suhbat chog‘ida Qirg‘iziston-O‘zbekiston har tomonlama strategik sheriklik munosabatlarining dolzarb masalalari yuzasidan fikr almashildi, ikki qardosh davlat o‘rtasidagi siyosiy muloqotni yanada chuqurlashtirish va har tomonlama hamkorlikni rivojlantirish muhimligi ta’kidlandi.

Uchrashuvda parlamentlararo hamkorlikni mustahkamlashga alohida e’tibor qaratildi. Qirg‘iziston Respublikasi Jogorku Keneshi va O‘zbekiston Respublikasi Oliy Majlisi o‘rtasida ham ikki tomonlama, ham ko‘p tomonlama platformalar, jumladan, Markaziy Osiyo mamlakatlari parlamentariylari formati doirasidagi faol va konstruktiv ishlar mamnuniyat bilan qayd etildi.

Shuningdek, parlamentlar darajasida bo‘lajak qo‘shma tashqi siyosat tadbirlari jadvali ham muhokama qilindi. Tomonlar oliy va yuqori darajada erishilgan kelishuvlarni amalga oshirish maqsadida samarali hamkorlikni davom ettirishga tayyor ekanliklarini bildirdilar.

Uchrashuv iliq va do‘stona ruhda o‘tdi va bu Qirg‘iziston va O‘zbekiston o‘rtasidagi o‘zaro anglashuv va ishonchning yuksak darajasini yana bir bor tasdiqlaydi.