2024 йил 12 июль куни Қозоғистон Президенти Қасим-Жомарт Токаев Бирлашган Араб Амирликларининг Республикадаги элчиси Mуҳаммад Саид Mуҳаммад ал-Арики билан учрашув ўтказди.
Давлат раҳбари БАА вакилларига Шанхай Ҳамкорлик Ташкилотининг Астана шаҳрида бўлиб ўтган саммитида иштирок этгани учун миннатдорлик билдирди.
Қозоғистон Президенти матбуот хизматининг хабар беришича, томонлар савдо-иқтисодий ва инвестиция соҳаларида илгари эришилган келишувларнинг юқори даражада бажарилишини муҳокама қилдилар. Шунингдек, Қозоғистон Республикаси ва БАА ўртасидаги стратегик инвестиция лойиҳалари тўғрисидаги Қўшма декларация доирасида ишларни давом эттириш зарурлиги таъкидланди.
Бундан ташқари, учрашув иштирокчилари энергетика ва транспорт-логистика соҳаларида, ахборот технологиялари ва сунъий интеллект соҳаларида ҳамкорлик истиқболларини кўриб чиқдилар.
2023 йил май ойи охирида Қозоғистон Президенти Абу-Даби амирлиги ҳукмрон оиласининг катта вакили Шайх Сурур бин Mуҳаммад Ал Наҳаён билан учрашди.
Учрашувда икки томонлама ҳамкорликни мустаҳкамлаш масалалари муҳокама қилинди.
Музокаралар якунида Қасим-Жомарт Токаев шайхга икки томонлама муносабатларни мустаҳкамлаш ва ривожлантиришга қўшган улкан ҳиссаси учун I даражали “Достық” орденини топширди.
«Йил бошида Амирликларга ташрифимни ва мамлакатингиз раҳбарияти билан музокараларни жуда мамнуният билан эслайман. Албатта, эришилган келишувлар халқларимиз манфаати учун хизмат қилади. Қозоғистон учун Бирлашган Араб Амирликлари Ислом оламидаги ишончли ва муҳим стратегик шерик, мустақилликнинг дастлабки йилларидан бошлаб бизни қўллаб-қувватлаб келаётган қардош мамлакатдир. Халқимиз буни доимо қадрлайди. Шунинг учун биз БАА нинг мамлакатимиз тараққиётига қўшган ҳиссасини дўстлик ва яқин ҳамкорликнинг ёрқин намойиши деб биламиз. Фурсатдан фойдаланиб, мамлакатингиз раҳбариятига ўз миннатдорчилигимни билдириб, Бирлашган Араб Амирликлари Президенти Шайх Mуҳаммад бин Заид Ал Наҳаёнга самимий тилакларимни билдирмоқчиман», – деди Қасим-Жомарт Токаев.
Сурат: Қозоғистон Республикаси Президентининг матбуот хизмати