2024 йил 11 июль куни Тожикистон Республикаси Иқтисодий ривожланиш ва савдо вазирлигида Миллий экологик, ижтимоий стандартлар ва корпоратив бошқарувни ривожлантириш бўйича идоралараро ишчи гуруҳи (ESG) нинг йиғилиши бўлиб ўтди.

Тадбирда турли идоралар вакиллари ва Халқаро Молия Корпорациясининг (ХМК) экспертлари ҳам иштирок этди.

Учрашувда Тожикистон Республикаси ҳукуматининг «Тожикистон Республикасида миллий экологик, ижтимоий стандартлар ва корпоратив бошқарув тўғрисида» ги қарори лойиҳаси кўриб чиқилди. ESG нинг амалдаги халқаро стандартлари ва уларни амалга оширишда бошқа мамлакатларнинг тажрибаси ўрганилди.

Шунингдек, Тожикистондаги катта жамоат аҳамиятига эга ташкилотлар томонидан миллий экологик, ижтимоий ва корпоратив стандартларга (ESG) риоя этилиши, вазирлик ва идоралар, шунингдек, давлат ҳокимиятининг маҳаллий ижро этувчи органлари томонидан ахборот-услубий ёрдам кўрсатилиши муҳокама қилинди.  

Тожикистон Республикасида Миллий экологик, ижтимоий стандартлар ва корпоратив бошқарув (ESG) лойиҳаси Халқаро молия корпорациясининг Тожикистон Республикасидаги ваколатхонаси кўмагида иқтисодий ривожланиш ва савдо вазирлиги билан биргаликда халқаро экспертларни жалб қилган ҳолда яратилган.

ХМК вакили ва экспертлар Тожикистонда фаолият юритаётган ташкилот ва корхоналар учун тренинглар ўтказишда ва ESG стандартларини қўллашда ёрдам беришларини таъкидладилар.

Давлат идоралари вакиллари ESG лойиҳасини ўз вақтида кўриб чиқдилар ва ҳамкорлик қилишга тайёр эканликларини билдирдилар.

Сурат: Тожикистон Республикаси иқтисодий ривожланиш ва савдо вазирлиги