Жакында өткөн маалымат жыйынында “Кыргызстандын аэропорттору” ААКсы 2024-жылдагы ишинин жыйынтыгын чыгарып, 2025-жылга пландары тууралуу айтып берди.

2024-жылы Караколдо, Таласта жана Нарында жаңы аэропорттор курулуп, өлкөнүн авиациялык инфраструктурасы кыйла кеңейди.

Жүргүнчүлөрдүн жалпы саны 6 миллиондон ашты – бул Кыргызстандын аэропорттору үчүн жаңы тарыхый рекорд.

«Асман аба жолдору» мамлекеттик авиакомпаниясы ачылып, буга чейин 100 миңден ашык жүргүнчүнү ташып, ички жана эл аралык байланыштарды бекемдеген.

Ош-Каракол, Бишкек-Ходжент сыяктуу жаңы каттамдар ачылды. Жакынкы пландарда Самарканд, Алматы, Ташкент жана башка шаарларга каттамдарды ачуу кирет.

“Манас” эл аралык аэропортунун аэропортунун терминалын кеңейтүү, ошондой эле Ош жана Ысык-Көл аэропортторунда жаңы терминалдарды куруу уланууда.

Өлкөнүн түштүгүндөгү эң ири инфраструктуралык долбоорлордун бири болгон Жалал-Абад шаарындагы жаңы эл аралык аэропорттун курулушу башталды.

2024-жылы “Манас” аэропортунун учуп-конуу тилкесин масштабдуу реконструкциялоо иштери башталган. 2026-жылы Ош аэропортунда да ушундай иштер башталат.

Заманбап технологиялар, анын ичинде Face ID киргизилип, 60ка жакын жаңы техникалар – электр сүйрөөчү буксирлер, үчүнчү реактивдүү көпүрө, өрт өчүрүүчү унаалар жана учууларды тейлөө үчүн башка жабдуулар сатылып алынды.

Эл аралык жарандык авиация уюмунун (ИКАО) аудитинин жыйынтыгы боюнча Кыргызстан 85,7 балл алды – бул аймактагы эң жакшы көрсөткүчтөрдүн бири.

«Бул жөн гана учактар жөнүндө эмес, бул өлкөнүн өнүгүшү, туризм жана ар бир адам үчүн жеткиликтүүлүк», – деп баса белгиледи Башкармалыктын төрагасы Манасбек Самидинов.