БОРБОР АЗИЯ, 02-июнь, 2025-жыл – Кербен маалыматы.Пакистан менен Ооганстан Өзбекстан-Ооганстан-Пакистан (UAP) темир жол долбоору боюнча алкактык макулдашууну эртерээк бүтүрүү үчүн тыгыз кызматташууну макулдашты.

Pakistan Today агенттигинин маалыматына ылайык, мындай чечим жекшемби күнү Пакистандын вице-премьер-министри жана тышкы иштер министри Исхак Дар менен талип өкмөтүнүн тышкы иштер министринин милдетин аткаруучу Амир Хан Муттаки телефон аркылуу сүйлөшкөндө кабыл алынды.

Тараптар долбоордун стратегиялык маанисин баса белгилеп, аны ишке ашырууну тездетүүгө убада беришти.

Буга чейин ушундай эле сүйлөшүүлөрдү Исхак Дар Өзбекстандын тышкы иштер министри Бахтияр Саидов менен жүргүзүп, анда үч тараптуу келишимге кол коюунун тартиби жана мөөнөтү талкууланган.

Темир жол долбоору Борбор Азия өлкөлөрүн Ооганстан аркылуу Пакистандын деңиз порттору менен байланыштырат. Каттам Ташкенттен Кабул аркылуу Пешаварга барат. Курулуштун сметалык баасы болжол менен 4,8 миллиард АКШ долларын түзөт. Долбоорду ишке ашыруу аймактык сооданын өнүгүшүнө олуттуу түрткү берет деп күтүлүүдө.

Амир Хан Муттаки Пакистандын Кабулдагы дипломатиялык катышуусун элчилик деңгээлине көтөрүү чечимин кубаттап, муну оң кадам деп атады. Ал Ооганстан дагы Исламабаддагы дипломатиялык өкүлчүлүгүн жаңыртууга ниеттенип жатканын ырастады.

Министрлер ошондой эле Исхак Дардын 19-апрелде Кабулга жасаган иш сапарынын жүрүшүндө жетишилген макулдашууларды ишке ашыруунун жүрүшүн талкуулашты жана өз ара ишенимди бекемдөө үчүн мындан ары да биргелешип иштөөгө даяр экендиктерин ырасташты.

Кытай талиптердин өкмөтүн расмий тааныбаса да, алардын дайындалган элчисин биринчи болуп кабыл алган өлкө болду, андан кийин Бириккен Араб Эмираттары жана башка бир катар өлкөлөр.

Сүрөт: Караван Инфонун өнөктөштөрү