Кыргыз Республикасынын Президенти Садыр Жапаров Кыргыз Республикасынын Улуттук коопсуздук мамлекеттик комитетинин (УКМК) борбордук аппаратынын жаңы административдик имаратынын ачылыш аземине катышты.

Алгач мамлекет башчы УКМКнын борбордук аппаратынын жаңы административдик имаратынын инфраструктурасы менен таанышты. Ал кызматкерлердин иш бөлмөлөрүн, административдик залдарды, конференц-залдарды, техникалык бөлмөлөрдү, ошондой эле кызматкерлердин эс алуу жана тамактануу жайларын карап чыкты.

Андан соң мамлекет башчысы УКМКнын кызматкерлерине, ардактуу ардагерлерине жана чакырылган конокторго кайрылып, тез өзгөрүп жаткан дүйнөнүн шартында улуттук коопсуздуктун мааниси болуп көрбөгөндөй өсүп жатканын белгиледи. Ал өлкөнүн туруктуулугун камсыз кылуу стратегиялык мамилени жана системалуу иштерди жүргүзүүнү талап кылаарын баса белгиледи.

Садыр Жапаров жаңы имарат заманбап стандарттарга ылайык курулуп, кызматкерлердин натыйжалуу иштеши үчүн бардык керектүү нерселер менен жабдылганын баса белгиледи. Ага административдик залдар, жумушчу кабинеттер, ашкана, спорт аянтчалары, көп кабаттуу унаа токтоочу жай, ошондой эле заманбап инфраструктуранын башка элементтери кирет.

Мамлекет башчысы Улуттук коопсуздук боюнча мамлекеттик комитет конституциялык түзүлүштү, аймактык бүтүндүктү коргоо, терроризмге жана коррупцияга каршы күрөшүү, контрчалгындоо жана аналитикалык иштерди жүргүзүү боюнча эң маанилүү милдеттерди аткарып, мамлекеттин ишенимдүү таянычы болуп калганын белгиледи.

Президент кызматтын ардагерлерине өзгөчө көңүл буруп, алардын улуттук коопсуздук тутумун түптөөгө жана өнүктүрүүгө кошкон салымын баса белгиледи. Ал коопсуздук органдарынын кызматкерлеринин бир нече муунунун жан аябас эмгегинин аркасында өлкөнүн улуттук коопсуздугу камсыздалганын, айрым учурларда кызматкерлер тагдырлуу милдеттерди чечүүдө өз өмүрүн кыйганын эске салды. Буга байланыштуу Садыр Жапаров маркум Жумабек Асанкуловду, Анарбек Бакаевди, Усуп Муканбаевди өзгөчө урматтоо менен эскерип, аларды Мекенге жан аябас кызмат кылуунун үлгүсү деп атады. Ал ошондой эле азыркы ардагерлер Таштемир Айтбаевдин, Турар Рыскелдиевдин жана Зайырбек Юнусалиевдин эмгек жолдору патриоттуулуктун үлгүсүнө айланган эмгектерин белгиледи.

Ал мамлекет башчысы катары улуттук коопсуздук маселелерине өзгөчө көңүл бурарын баса белгиледи.

Алсак, 2021-жылдан бери Улуттук коопсуздук боюнча мамлекеттик комитеттин органдарын модернизациялоонун алкагында республика боюнча 94 объект, анын ичинде 73 административдик имарат, 7 бала бакча жана 14 социалдык турак жай имараты пайдаланууга берилди. Стратегиялык кадамдардын бири болуп өзүбүздүн генерал-лейтенант Анарбек Бакаев атындагы Улуттук коопсуздук академиясынын ачылышы болду. Ал белгилегендей, мурда адистер чет өлкөдөн даярдалып келсе, эми Кыргызстанда заманбап технологияларды, иштөө ыкмаларын өздөштүргөн жаңы кадрлар даярдалат.

Президент Улуттук коопсуздук боюнча мамлекеттик комитеттин борбордук аппаратынын улуттук коопсуздук саясатын иштеп чыгууда жана ишке ашырууда, анын ичинде глобалдык жана аймактык чакырыктардын контекстинде маанилүү координациялоочу ролун баса белгиледи.

Ал УКМКнын борбордук аппаратынын мурунку имараты 1983-жылы курулуп, кызматкерлердин бир нече муунуна көп убакыт кызмат кылганын эске салды. 2023-жылы материалдык-техникалык базаны модернизациялоо программасынын алкагында заманбап курулуш технологияларын колдонуу менен жаңы имараттын курулушу башталган. Жацы комплексте эффективдуу иштее учун бардык шарттар тузулген.

Мамлекет башчы кызматкерлердин чечкиндүү аракеттеринин аркасында коррупцияга жана уюшкан кылмыштуулукка каршы элдешпес күрөш ийгиликтүү уланып жатканын айтты. Натыйжада өлкө бюджетине 200 миллиард сомдон ашык каражат кайтарылып, экономиканы өнүктүрүүгө кошкон чоң салым болуп калды. Ошондой эле, мурда мыйзамсыз менчиктештирилген 1100дөн ашык кыймылдуу жана кыймылсыз мүлк объекттери мамлекетке кайтарылып, калктын кеңири колдоосуна ээ болду.

"Улуттук коопсуздук – бул атайын кызматтардын гана иши эмес, бүтүндөй элдин, ар бир жарандын иши! Жаңы Кыргызстанды куруу ниетибизде бирдиктүү болсок, өлкөбүздүн коопсуз келечегин камсыздай алабыз. Ошондуктан, мен бардыгын бул аракеттерди көрүп, түшүнүп, колдоого чакырам!", – деп белгиледи сөзүнүн аягында Президент Садыр Жапаров.