Bishkekda “Oziq-ovqat xavfsizligi: ilm-fan amalda” shiori ostida Butunjahon oziq-ovqat xavfsizligi kuniga bag‘ishlangan davra suhbati bo‘lib o‘tdi.

Tadbir Sog‘liqni saqlash vazirligining Kasalliklarning oldini olish va davlat sanitariya-epidemiologiya nazorati boshqarmasi tomonidan M.Riskulbekov nomidagi Qirg‘iziston iqtisodiyot universiteti bilan hamkorlikda tashkil etildi.

Tadbirda davlat organlari, xalqaro tashkilotlar vakillari, oliy o‘quv yurtlari va kollej o‘qituvchilari, aspirant va magistrantlar, talabalar, shuningdek, ta’lim hamjamiyatlari, biznes tuzilmalari vakillari ishtirok etdi.

Davra suhbatining maqsadi yashil iqtisodiyotga o‘tish sharoitida oziq-ovqat sanoatiga innovatsion texnologiyalarni joriy etish masalalarini muhokama qilish, shuningdek, oziq-ovqat mahsulotlari sifati va xavfsizligini oshirish, oziq-ovqat chiqindilarini minimallashtirish va atrof-muhitga ta’sirini kamaytirishga qaratilgan barqaror yechimlarni ko‘rib chiqishdan iborat edi. Ishtirokchilar oziq-ovqat mahsulotlari xavfsizligini ta’minlashda barcha bosqichlarda – ishlab chiqarishdan tortib to iste’mol qilishgacha bo‘lgan davrda soha ilm-fanining yutuqlarini qo‘llash muhimligini ta’kidladilar.

Bunday tadbirlarning o‘tkazilishi jahon standartlari va kelajak avlodlar ehtiyojlariga javob beradigan barqaror va xavfsiz oziq-ovqat tizimini yaratishda ilm-fan, biznes va davlat organlari sa’y-harakatlarini birlashtirishga xizmat qilmoqda.