O‘zbekiston Markaziy banki va Singapur Valyuta boshqarmasi huzuridagi Global moliya va texnologiya tarmog‘i (GFTN) o‘rtasida kelishuv imzolandi.Anglashuv memorandumi, fintech sohasida strategik hamkorlikka qaratilgan. Yangi hujjat respublikada zamonaviy moliyaviy texnologiyalar ekotizimini yaratish uchun asos bo‘ladi.

Bitim FinTech milliy strategiyasini ishlab chiqish, mutaxassislarni tayyorlash, startaplarni qo‘llab-quvvatlash, venchur moliyalashtirish va yashil iqtisodiyot uchun raqamli platformalarni ishga tushirish kabi qator tashabbuslarni amalga oshirishni ko‘zda tutadi.

Hamkorlikning asosiy yo'nalishlari:

• fintech sektorini rivojlantirish bo‘yicha yo‘l xaritasini shakllantirish;
• ta'lim va akseleratsiya dasturlarini ishga tushirish;
• xakatonlar, forumlar va sanoat tadbirlarini o'tkazish;
• raqamli iqtisodiyotda innovatsion yechimlarni ilgari surish.

O‘zbekiston global fintech markazlaridan biri bo‘lgan Singapurning ilg‘or tajribasidan foydalanish imkoniyatiga ega bo‘lmoqda va bu tajribadan qulay raqamli muhit yaratish va texnologik tashabbuslar o‘sishini tezlashtirish uchun foydalanishni maqsad qilgan.