Быйылкы жылдан баштап Ош шаарынын ичинде дарбыз, коон сатууга атайын бөлүнгөн жерде гана уруксат берилет. Бул тууралуу мэриянын басма сөз кызматы билдирди.

Коондорду көчө жээгинен жана жүк ташуучу унаалардан стихиялуу соодалоого тыюу салынат. Мындай чечим Ош шаарынын мэри Жеңишбек Токторбаевдин тапшырмасы менен көчө соодасын жөнгө салуу, жол коопсуздугун камсыздоо жана жолдордо башаламандыкка жол бербөө максатында кабыл алынды.

Мындан тышкары борбордук жана ички көчөлөрдө убактылуу жайгашкан КАМАЗ, HOWO сыяктуу оор жүк ташуучу унаалар да шаардын сыртына чыгарылат.

Шамшат көчөсүнөн муниципалдык базардын жанынан 3 гектар атайын аянт дарбыз, коон сатуу жана жүк ташуучу унааларды токтотуу үчүн бөлүнгөн. Сайт бүгүнкү күндө иштеп жатат.