Бишкекте Кыргыз Республикасынын Акыйкатчы (Омбудсмен) институтунун потенциалын баалоо боюнча эл аралык эксперттик миссиясы ишин баштады. Бул иш сапар "А" статусун алуу үчүн зарыл болгон процедуранын бир бөлүгү болуп саналат – институттун Париж принциптерине шайкештигин эл аралык таануу.

Буга чейин биринчи этапта миссия мүчөлөрү институттун жетекчилиги жана министрлер кабинетинин төрагасынын орун басары Эдил Байсалов менен онлайн режиминде жолугушууларды өткөрүшкөн.

Миссиянын курамына Бириккен Улуттар Уюмунун Адам укуктары боюнча Жогорку Комиссарынын Аппаратынын (АУЖКБ), Бириккен Улуттар Уюмунун Өнүктүрүү Программасынын (ПРООН) жана Адам укуктары боюнча улуттук институттардын Азия-Тынч океан форумунун (APF NHRIs) өкүлдөрү кирди.

Иш сапардын биринчи күнүндө Акыйкатчы Жамиля Жаманбаева жана анын орун басарлары менен жолугушуу болду. Эки жуманын ичинде миссия институттун ар бир кызматкери менен жекече маектешүүлөрдү, ошондой эле мамлекеттик органдардын жана жарандык коомдун өкүлдөрү менен жолугушууларды өткөрүүнү пландаштырууда. Мындан тышкары, анонимдүү сурамжылоолор кызматкерлер арасында бөлүштүрүлөт.

"Биздин иш сапардын максаты – учурдагы мүмкүнчүлүктөрдү баалоо гана эмес, андан ары өнүктүрүү боюнча сунуштарды иштеп чыгуу. Ошондой эле Ош жана Нарындагы аймактык өкүлчүлүктөрдү кыдырабыз", – деди миссиянын жетекчиси, эл аралык эксперт Росслин Нунан.

Иш сапардын жыйынтыгында байкоолордун, сурамжылоолордун жана интервьюлардын жыйынтыктары, ошондой эле Акыйкатчы институтунун ишинин натыйжалуулугун жогорулатуу боюнча сунуштар камтылган жыйынтыктоочу отчет түзүлөт.

“А” статусу Кыргызстандын Акыйкатчысына Эл аралык адам укуктары кеңешинин жыйындарына катышууга жана институттун атынан билдирүү жасоого мүмкүндүк берет.