Европа Биримдигинин Кеңешинин Чыгыш Европа жана Борбор Азия менен байланыштар боюнча жумушчу тобунун делегациясы Кыргызстанга келди. Бул тууралуу Кыргызстандын Тышкы иштер министрлигинин басма сөз кызматы билдирди.

Иш сапардын алкагында делегация КР Тышкы иштер, Ички иштер, Юстиция, Санариптик өнүктүрүү, Энергетика, Жаратылыш ресурстары, Экология жана техникалык көзөмөл министрликтеринин өкүлдөрү менен жолугушту.

Тараптар туруктуу өнүгүү, пробация, экология, климаттын өзгөрүшү жаатында кызматташуунун артыкчылыктуу багыттарын, ошондой эле мыйзам үстөмдүгүнүн принциптерин илгерилетүү жана адам укуктарын коргоо маселелерин талкуулашты.

Өзгөчө көңүл гидроэнергетика, энергиянын кайра жаралуучу булактары, тоо-кен тармагындагы артыкчылыктуу инвестициялык долбоорлорго, ошондой эле санариптик өнүгүү жана инновациялык технологиялар чөйрөсүндө кызматташуунун келечегине бурулду.

Евробиримдиктин долбоордук-программалык иш-чараларынын алкагында делегация тиешелүү долбоорлорду ишке ашыруунун жүрүшү менен таанышты.