Yevropa Ittifoqi kengashining Sharqiy Yevropa va Markaziy Osiyo bilan aloqalar bo‘yicha ishchi guruhi delegatsiyasi Qirg‘izistonga tashrif buyurdi. Bu haqda Qirg‘iziston TIV matbuot xizmati xabar berdi.

Tashrif doirasida delegatsiya Qirg‘iziston Respublikasi Tashqi ishlar, Ichki ishlar, Adliya, Raqamli rivojlanish, Energetika, Tabiiy resurslar, Ekologiya va texnik nazorat vazirliklari vakillari bilan uchrashdi.

Tomonlar barqaror rivojlanish, probatsiya, ekologiya, iqlim o‘zgarishi sohasidagi hamkorlikning ustuvor yo‘nalishlarini, shuningdek, qonun ustuvorligi va inson huquqlarini himoya qilish tamoyillarini ilgari surish masalalarini muhokama qildilar.

Gidroenergetika, qayta tiklanuvchi energiya manbalari, tog‘-kon sanoati sohasidagi ustuvor investitsiya loyihalari, shuningdek, raqamli rivojlanish va innovatsion texnologiyalar sohasidagi hamkorlik istiqbollariga alohida e’tibor qaratildi.

Yevropa Ittifoqining loyiha va dasturiy faoliyati doirasida delegatsiya tegishli loyihalarni amalga oshirishning borishi bilan tanishdi.