2025-жылы жаңы мектеп окуу китептерин басып чыгарууга мамлекет 744 миллион сом бөлгөн. Бул тууралуу КРнын билим берүү министринин орун басары Надира Жусупбекова билдирди.

Планга ылайык, бардык класстар үчүн кыргыз жана орус тилдериндеги окуу китептеринин толук комплектисин басып чыгаруу 2028-жылга чейин аяктайт.

3–9-класстар үчүн англис тили боюнча 1 миллион 262 миң 420 нуска китеп басылып чыгып, 272,7 миллион сомду түздү.
Кошумчалай кетсек, Улуу Британия элчилигинин колдоосу менен дээрлик 25 миллион сомго 158 700 нуска басылып чыккан.
1, 2, 5 жана 7-класстар үчүн математика жана табият таануу китептеринин экспертизасы аяктоо алдында турат.
Россия Федерациясынын Билим берүү министрлиги менен биргеликте орус тили жана адабияты боюнча окуу китептери ошол эле класстарга ылайыкталууда.

Билим берүү реформасы 12 жылдык мектепте билим берүүгө өтүүнүн алкагында ишке ашырылууда. Жаңы Мамлекеттик билим берүү стандарты бекитилип, 38 предметтик стандарт жаңыртылган, заманбап программалар жана окуу-методикалык комплекстер (ОКМ) иштелип чыгууда.

"Мугалимдер жаңы практикага багытталган технологияларды өздөштүрүүдө, айрыкча STEM программаларынын алкагында. Математика, табият таануу, физика, химия, биология жана англис тили сабактарына басым жасалууда", – деп баса белгиледи Жусупбекова.

Жаңы окуу-методикалык комплекттерге окуу китептери гана эмес, ошондой эле критикалык ой жүгүртүүнү жана практикалык көндүмдөрдү өнүктүрүүгө багытталган иш китептери, аудио жана видео материалдар, окуу куралдары да камтылган. Бардык материалдар улуттук жана эл аралык стандарттарга ылайык келет.