Астана, 2025 жылғы 18 маусым – Караван Инфо ақпараттық агенттігі.Қазақстан мен Қытай арасындағы өнеркәсіптік кооперация жалпы құны 35 миллиард доллар болатын 133 жобаны қамтиды, бұл 36 мыңнан астам жұмыс орнын құруға мүмкіндік береді. Бұл туралы ҚР Индустрия және құрылыс вице-министрі Олжас Сапарбеков «Орталық Азия – Қытай» өнеркәсіптік және инвестициялық ынтымақтастықтың екінші форумы барысында айтты.

Белсенді іске асыру және дамыту сатысында тау-кен металлургия кешені, машина жасау және экономиканың басқа да секторлары сияқты негізгі салаларда құны 26 миллиард доллар болатын 79 бірлескен жоба бар.

Форумның басты мақсаты – экономикалық байланыстарды дамыту және нығайту, өзара инвестиция тарту, бірлескен өндірістер құру және аймақтың стратегиялық секторларында кооперация жобаларын ілгерілету. Вице-министр көпжақты ынтымақтастықтың оң динамикасы мен Орталық Азия – Қытай бірінші саммитінің қорытындысы бойынша қол жеткізілген уағдаластықтардың сапалы дамуын атап өтті.

Іс-шараның нәтижесінде қазақстандық және қытайлық компаниялар арасында жалпы сомасы 24 миллиард доллардан асатын 58 коммерциялық келісімге қол қойылды.

Фото:Қазақстан Республикасы Индустрия және құрылыс министрлігі