Ысык-Көл облусунун Жети-Өгүз районуна караштуу Барскоон айылына жакын жолдо кооз аймакты аралап бара жаткан туристтердин унаасы капысынан бузулуп калды.

Ысык-Көлдө жол жээгинде жардам күткөн чет элдик конокторго Ысык-Көл облустук ички иштер башкармалыгынын туристтик жана экологиялык милициясынын кызматкерлери өз убагында колдоо көрсөтүштү.

Унаанын кыймылдаткычында техникалык мүчүлүштүк бар экени белгилүү болду. Милиция туристтерди Барскоон айылындагы жакынкы май куюучу жайга чейин узатып, ал жерден такси чакырып, сапарын аман-эсен улантууга шарт түзгөн.

Келген коноктор кыргыз милициясынын ыкчам жана меймандос жардамына ыраазычылык билдирип, өлкөдө коопсуздуктун жогорку деңгээлин белгилешти.

Бул окуя милиция кызматкерлеринин Ысык-Көл облусунда эс алып жүргөн тургундарга жана туристтерге көрсөткөн камкордугунун жана ишениминин ачык мисалы болуп калды.