29-июнда Кыргызстандын президенти Садыр Жапаров Чолпон-Ата шаарында Орусиянын тышкы иштер министри Сергей Лавровду кабыл алды.

Тараптар эки тараптуу жана көп тараптуу кызматташуунун актуалдуу маселелерин, ошондой эле интеграциялык бирикмелердин алкагындагы өз ара аракеттенүүнү талкуулашты.

Мамлекет башчысы Кыргыз Республикасы Россия Федерациясы менен союздаштык жана стратегиялык өнөктөштүктүн духунда ырааттуу бекемделген көп кырдуу кызматташтыкты өнүктүрүүгө артыкчылыктуу маани берерин баса белгиледи.

Президент Орусия Кыргызстандын эң маанилүү соода-экономикалык өнөктөшү бойдон кала берээрин белгиледи. Россиядан түз инвестициялар оң динамикасын көрсөтүп, Россия Федерациясы өлкөнүн экономикасына эң ири инвестор болуп калууда.

Садыр Жапаров Кыргыз-Орус өнүктүрүү фондунун ролуна өзгөчө көңүл буруп, аны инвестициялык кызматташтыкты чыңдоодогу негизги инструменттердин бири деп атады.

Президент өлкө экономикасындагы алгылыктуу өзгөрүүлөрдү белгилеп, Кыргызстан акыркы үч жылда олуттуу жыйынтыктарга жетишкенин баса белгиледи.

"Кыргызстан туруктуу өнүгүү жана прогресс жолу менен ишенимдүү бара жатат. Биздин артыкчылыктарыбызга энергетика, транспорт, санариптештирүү, туризм, ошондой эле сейрек кездешүүчү жана маанилүү минералдык ресурстарды өнүктүрүү кирет", – деп белгиледи Президент.

Өз кезегинде Орусиянын тышкы иштер министри Сергей Лавров биринчи кезекте Россиянын президенти Владимир Путиндин саламын айтты.

«Өлкө башчылары өз ара аракеттенүүнү орнотууда, ар түрдүү тармактарда пайда болгон көйгөйлөрдү чечүүдө өң-түстү белгилешкени тышкы иштер министрлери катары бизди бардык мамлекеттик органдардын координацияланган ишин жигердүү камсыздоого милдеттендирет», – деп белгиледи министр Сергей Лавров.

Ал ошондой эле эки тараптуу пландардан тышкары КМШнын жалпы мейкиндигинде интеграциялык процесстердин алкагында чечилип жаткан үзгүлтүксүз милдеттер бар экенин баса белгиледи. Анын ичинде Көз карандысыз Мамлекеттер Шериктештиги, албетте Евразиялык экономикалык биримдик, учурда Кыргызстан төрагалык кылган ЖККУ да бар.

Россиянын Тышкы иштер министрлигинин башчысы ошондой эле Кыргызстанда жүргүзүлүп жаткан реформалардын маанилүүлүгүн белгилеп, Россиянын мындан ары да негизги багыттарда кызматташууну кеңейтүүгө даярдыгын билдирди.

Корутундусунда тараптар союздук мамилелерди мындан ары да енуктурууге жана эл аралык аренада кызматташтыкты терендетууге умтулгандыктарын ырасташты.