Каракол шаарынын мэри Каныбек Адиев жана шаардык кеңештин төрагасынын орун басары Бакыт Сеитов Брест (Беларусь) шаарынын аткаруу комитетинин төрагасы Сергей Николаевич менен расмий жолугушуу өткөрдү, деп билдирди мэриядан.

Жолугушууда эки тараптуу кызматташтыкты бекемдөөгө багытталган маанилүү келишимдер талкууланды. Каракол менен Бресттин ортосунда “бир тууган шаар” макамын ыйгаруу боюнча келишимге расмий кол коюлду.

Бул келишим маданият, билим берүү, туризм жана муниципалдык башкаруу тармактарында тажрыйба алмашууга жана кызматташтыкты өнүктүрүүгө негиз түзөт, ошондой эле достук байланыштарды чыңдоого жана шаарлар ортосунда туруктуу байланыштарды түзүүгө өбөлгө түзөт.

Жолугушуу достук жана өз ара түшүнүшүү кырдаалында өтүп, тараптар мындан аркы тыгыз кызматташууга даяр экендиктерин билдиришти.

Бул кадам Каракол шаарынын эл аралык байланыштарын кеңейтүү, шаардык дипломатияны өнүктүрүү жана өз ара пайдалуу өнөктөштүктүн жаңы этабын баштоо үчүн жаңы мүмкүнчүлүктөрдү ачат.