2025-yil 1-iyul kuni Bishkek shahrida Qirg‘iziston Respublikasi Vazirlar Mahkamasi, Kasaba uyushmalari federatsiyasi va ish beruvchilar uyushmalari o‘rtasida yangi Bosh kelishuv imzolandi. Hujjatda kelgusi uch yilga mo‘ljallangan ijtimoiy-iqtisodiy siyosatning ustuvor yo‘nalishlari belgilab berilgan hamda barqaror rivojlanish vositasi sifatida ijtimoiy muloqotning asosiy o‘rni ta’kidlangan.

Bosh kelishuv davlat, biznes va mehnatkashlar manfaatlarini muvofiqlashtirish platformasi bo‘lib xizmat qiladi. U norozilik emas, balki muzokaralar yo‘li bilan mehnat nizolarining oldini olishga, shuningdek, barcha tomonlarning fikrlarini hisobga olgan holda qonunchilikni takomillashtirishga qaratilgan. Hujjat ishtirokchilarning umumiy majburiyatlarini belgilab beradi hamda iqtisodiyot, mehnat bozori va ijtimoiy ta’minot tizimini rivojlantirish bo‘yicha aniq chora-tadbirlarni o‘z ichiga oladi.

Bitim qoidalarining bajarilishini nazorat qilish Respublika uch tomonlama komissiyasi tomonidan amalga oshiriladi.

Yangi kelishuvning asosiy yo'nalishlari orasida:

• “yashil” texnologiyalarni qo‘llab-quvvatlash, norasmiy bandlikni qisqartirish, agrosanoat sektorini modernizatsiya qilish;
• ish o‘rinlarini tashkil etish, kadrlarni qayta tayyorlash, yoshlar va aholining ijtimoiy himoyaga muhtoj qatlamlari bandligini ta’minlashga ko‘maklashish;
• mehnatni muhofaza qilishning zamonaviy standartlarini joriy etish, ish joylarida zo'ravonlikni bartaraf etish bo'yicha dasturlarni amalga oshirish;
• gender tengligini ta'minlash, yoshlar huquqlarini himoya qilish, teng haq to'lash;
• kasaba uyushmalari va ish beruvchilar uyushmalarining qonun ijodkorligi jarayonlarida ishtirokini kuchaytirish.

Yangi hujjat tomonlarning birgalikdagi rivojlanish, ijtimoiy adolat va mamlakat fuqarolari manfaatlari yo‘lida sheriklikni mustahkamlashga sodiqligini tasdiqlaydi.