БОРБОРДУК АЗИЯ, 3-июль, 2025-жыл – Караван инфо маалымат агенттиги.Пакистан Кытай-Пакистан экономикалык коридорун (CPEC) өнүктүрүүнүн алкагында Ооганстан менен соода жана транспорттук байланыштарды активдештирүү ниетин билдирди. Бул тууралуу Шанхай кызматташтык уюмуна (ШКУ) мүчө мамлекеттердин транспорт министрлеринин жыйынында Пакистандын транспорт жана коммуникация министри Абдул Алим Хан билдирди.

Анын айтымында, Пакистан CPEC алкагында автожолдорду курууда олуттуу ийгиликтерге жетишти жана бул инфраструктураны Ооганстан жана региондогу башка өлкөлөр менен сооданы кеңейтүү үчүн колдонууну пландаштырууда.

"Пакистан өлкөнүн экономикалык өсүшүн колдой турган жаңы соода жолдорун жана транспорттук коридорлорду түзүү аркылуу Ооганстан жана Иран менен соода мамилелерин чыңдоого кызыкдар".
— деп белгиледи министр.

Ал ошондой эле Өзбекстан-Ооганстан-Пакистан темир жол долбоорунун маанилүүлүгүн белгилеп, аны региондук өнүгүүнүн негизги элементи деп атады.

Абдул Алим Хан белгилегендей, аймакты туруктуу өнүктүрүү өз ара ишенимдин, кызматташтыктын жана заманбап транспорт тармактарын түзүүнүн негизинде гана мүмкүн. Ал Пакистан Ооганстанды аймактагы башка мамлекеттер менен байланыштырган эффективдүү транспорттук системаны түзүү боюнча ишти улантууга ниетин кайталады.

Сүрөт: Караван Инфонун өнөктөштөрү