Кыргыз Республикасынын Президенти Садыр Жапаров 3-4-июлда Ханкенди шаарында өтө турган Экономикалык Кызматташтык Уюмунун (ЭКУ) 17-саммитине катышуу үчүн Азербайжан Республикасына иш сапары менен барат. Бул тууралуу КР президентинин аппаратынын тышкы саясат бөлүмүнүн башчысы Сагынбек Абдумуталип билдирди.

«Саммиттин темасы – «Туруктуу жана климатка туруктуу келечек үчүн ЭКОнун жаңы көз карашы».

Саммитке Уюмга мүчө мамлекеттердин – Афганистандын, Азербайжан Республикасынын, Иран Ислам Республикасынын, Пакистан Ислам Республикасынын, Кыргыз Республикасынын, Казакстан Республикасынын, Тажикстан Республикасынын, Өзбекстан Республикасынын, Түркия Республикасынын жана Түркмөнстандын мамлекет жана өкмөт башчылары катышат.

Тараптар Уюмдун күн тартибиндеги актуалдуу маселелерди, анын ичинде климаттын өзгөрүшүнө бөгөт коюу боюнча мүчө мамлекеттер тарабынан көрүлүп жаткан чараларды талкуулашат.

Жумушчу сапардын алкагында ошондой эле Азербайжан Республикасынын Агдам облусунда кыргыз тарап тарабынан курулган Айкөл Манас мектебинин расмий ачылышы болот», – деп белгиледи Сагынбек Абдумуталип.