Астана, 3 шілде 2025 жыл – Караван Инфо ақпараттық агенттігі.ҰОК кеңсесінде ҚР Ұлттық Олимпиада комитетінің президенті Геннадий Головкин Қазақстан Республикасы Парламенті Мәжілісінің депутаты Магеррам Магеррамовпен жұмыс кездесуін өткізді.

Диалог барысында тараптар елдегі олимпиадалық қозғалысты дамытудың негізгі бағыттарын, соның ішінде Қазақстанның халықаралық спорт аренасындағы позициясын нығайту және отандық спорттың бәсекеге қабілеттілігін арттыру мәселелерін талқылады.

Спортшылар мен жаттықтырушыларға арналған білім беру бағдарламалары мәселелеріне, сондай-ақ Азия Олимпиадалық Кеңесі және Халықаралық Олимпиада комитеті сияқты халықаралық ұйымдармен әріптестік қарым-қатынасты дамытуға ерекше назар аударылды.

Жиынға қатысушылар спорт саласындағы заңнамалық бастамаларға да тоқталды. Тараптар бірқатар мәселелерді шешуге жүйелі көзқарас қажеттігін атап өтіп, спорт саласының тұрақты дамуы үшін одан әрі ынтымақтастыққа дайын екендіктерін жеткізді.

Фото: ҚР ҰОК