БОРБОРДУК АЗИЯ, 12-июль, 2025-жыл – Караван инфо маалымат агенттиги.Талибандын өнөр жай жана соода министри Нуруддин Азизи Казакстандын вице-премьер-министри жана тышкы иштер министри Мурат Нуртлеу менен эки өлкөнүн соода-экономикалык байланыштарын кеңейтүүнү талкуулады.

Талибандын Өнөр жай жана соода министрлиги эки тарап жолугушууда соода көлөмүн 3 миллиард долларга жеткирүү боюнча макулдашканын билдирди.

Жума күнү (11-июлда) жарыяланган билдирүүдө кызматташтык айыл чарба продукцияларын экспорттоо менен чектелбестен, өнөр жай продукцияларына жана технологияларга өзгөчө көңүл бурулары баса белгиленген.

Талибандын Соода министрлигинин маалыматына караганда, тараптар ошондой эле автомобиль жана темир жол транспорту боюнча биргелешкен компанияларды түзүүнү, ошондой эле ооган ишкерлери үчүн виза режимин жөнөкөйлөтүүнү макулдашты.

Кошумчалай кетсек, Казакстандын вице-премьер-министри 100 ооган студентине кесиптик билим берүүгө даяр экенин билдирди.

Ал ошондой эле Казакстан Ооганстанга бир миллион доллар гуманитардык жардам бөлгөнүн жарыялады.

Сүрөт: Караван ААнын өнөктөштөрү