2025-жылдын 11-июлунда Кыргыз Республикасынын Тышкы иштер министринин орун басары Алмаз Имангазиев менен Америка Кошмо Штаттарынын Кыргыз Республикасындагы Атайын жана Ыйгарым укуктуу Элчиси Лесли Вигеринин жолугушуусу болуп өттү.

Жолугушуунун жүрүшүндө тараптар консулдук чөйрөдөгү кыргыз-америка кызматташтыгынын актуалдуу маселелерин талкуулашты. Өзгөчө көңүл КР жарандары үчүн АКШнын виза саясатындагы акыркы өзгөрүүлөргө бурулду.

Министрдин орун басары А.Имангазиев аталган өзгөртүүлөргө байланыштуу кыргыз тараптын тынчсыздануусун билдирип, бул теманы талкуулоого конструктивдүү жана мазмундуу мамиле кылуу, ошондой эле өз ара принциптерди сактоо зарылдыгын белгиледи.

Өз кезегинде Элчи Л.Вигери Кыргыз Республикасынын жарандарынын Америка Кошмо Штаттарынын аймагында жүрүүсү боюнча статистикалык маалыматтар менен тааныштырып, АКШнын виза саясатындагы миграциялык өзгөрүүлөр тууралуу маалымат берди.

Жолугушуунун жыйынтыгында тараптар өз ара алгылыктуу чечимдерди иштеп чыгуу максатында консультацияларды улантууну макулдашышты.