БОРБОРДУК АЗИЯ, 13-июль, 2025-жыл – Караван инфо маалымат агенттиги.БУУнун Башкы катчысынын атайын өкүлү Роза Отунбаева БУУнун Качкындар боюнча Жогорку комиссарлыгынын Ооганстандагы өкүлү Арафат Жамал менен бирге Гератка келди. Отунбаева билдиргендей, иш сапарынын максаты Ооганстандын батышындагы Ислам-Кала чек ара бекетине баруу.

Иш сапарынын алкагында ал талиптердин Герат губернатору менен жолугушту. Губернатордук кеңседен билдиришкендей, UNAMA (Бириккен Улуттар Уюмунун Ооганстандагы Миссиясы) жетекчиси кайтып келген качкындардын үнүн дүйнөлүк коомчулукка жеткирүү жана репатриация процессин уюштурууда зарыл колдоо көрсөтүү үчүн эл аралык уюмдар менен кызматташууга убада берди.

Гераттын губернатору Нур Ахмад Ислам Жарр UNAMA жетекчилигин ооган качкындарынын абалына көңүл бурууга жана алардын негизги муктаждыктарын канааттандыруу үчүн чараларды көрүүгө чакырды.

Буга чейин Талибандын Качкындар боюнча жогорку комиссиясы акыркы 19 күндө Ирандан жарым миллиондон ашык ооган депортацияланганын кабарлаган.

Сүрөт: Караван ААнын өнөктөштөрү