Өзгөчө кырдаалдар министри, генерал-майор Бообек Ажыкеевдин тапшырмасы менен Өзгөчө кырдаалдар министрлигинин адистери Чүй облусунун Кегети тоолорунда жайгашкан Көл-Төр көлүнө изилдөө жүргүзүштү.

Окуя болгон жерге 13-июль күнү Өзгөчө кырдаалдарга мониторинг жана байкоо департаментинин кызматкерлери, облустук башкармалыктын куткаруучулары чыгышкан. Иштин максаты көлдөгү суунун көлөмүн тактоо, агын суулардын деңгээлин өлчөө жана морена дамбасынын туруктуулугун баалоо болгон.

Иликтөө көрсөткөндөй, көлдөгү суунун көлөмү климаттык нормага туура келет, жылып кетүү коркунучу жок. Бирок, агып кетүү жана жарылып кетүү коркунучун алдын алуу максатында адистер суунун деңгээлин сифондук ыкма менен түшүрүшкөн.

Өзгөчө кырдаалдар министрлиги Көл-Төр көлүнүн ылдый жагында жайгашкан конуштардын тургундары кооптонууга эч кандай негиз жок экенин белгилейт. Кыргызстанда климаттын өзгөрүшүнө байланыштуу мөңгүлөрдүн эришинен улам толуп жаткан жүздөгөн тоо көлдөрү бар.