Москва, 15-июль, 2025-жыл – Караван инфо маалымат агенттиги. Сауд Арабиясы Орусия менен геологиялык чалгындоо жана кен байлыктарды иштетүү жаатында кызматташууну кеңейтүүгө кызыкдар экенин билдирди.

Бул тууралуу падышалыктын өнөр жай жана минералдык ресурстар министри Бандар аль-Хурейф Екатеринбургдагы Innoprom эл аралык көргөзмөсүндө билдирди.

Анын айтымында, Эр-Рияд жашыл энергетика, электроника жана коргонуу өнөр жайын өнүктүрүү үчүн стратегиялык маанилүү ресурс болгон сейрек кездешүүчү элементтерди камтыган кендерди чалгындоо жана иштетүү үчүн орусиялык компанияларды тартуу мүмкүнчүлүгүн карап жатат.

Министр белгилегендей, өлкөнүн 2024-жылга карата минералдык ресурстардын баасы 1,3 триллион доллардан 1,5 триллион долларга чейин көбөйгөн, бул тармактын келечегин ырастайт.

Сауд Арабиясы экономиканы диверсификациялоо жана мунайга болгон көз карандылыкты азайтуу максатын көздөгөн Vision 2030 стратегиясын активдүү ишке ашырууда. Тоо-кен тармагын өнүктүрүү жана бул жаатта эл аралык өнөктөштүктү түзүү анын негизги элементтеринин бири.

Геологиялык чалгындоо жана сейрек кездешүүчү металлдарды байытуу боюнча жогорку деңгээлдеги тажрыйбасы менен Орусия Эр-Рияд үчүн маанилүү технологиялык өнөктөш боло алат.

Орусиянын Өнөр жай жана соода министрлиги кабарлагандай, учурда технологияларды жеткирүү боюнча гана эмес, биргелешкен инвестициялык долбоорлор боюнча да сүйлөшүүлөр жүрүп жатат.

Сүрөт: РИА Новостижалбырактары