Бүгүн Кара-Балта шаарында “Орион-Экстра” жаңы тегирмен жана элеватор комплексинин курулушуна капсула салууга арналган салтанаттуу иш-чара өттү. Бул долбоор Кыргызстандын азык-түлүк коопсуздугун чыңдоо жана кайра иштетүү өнөр жайын өнүктүрүүдөгү маанилүү этап болуп калды.

«Орион-Экстра» ЖЧКсынын жеринде курула турган тегирмен суткасына 250 тоннага чейин дан иштетет, бул иштеп жаткан ишкананын кубаттуулугунан үч эсе көп. Жаңы объектти ишке киргизүү 2026-жылдын августуна пландаштырылган.

Долбоорго инвестициянын көлөмү 5 миллион АКШ долларын түзөт. Бүгүнкү күндө ишканада 25 адам иштейт, ал эми жаңы комплекс ишке киргенден кийин операторлор, технологдор, логистикалык адистер жана административдик кызматкерлерден турган кошумча 60 жумушчу орун түзүлөт.

Долбоор Кыргыз Республикасынын Министрлер Кабинетинин колдоосу менен «Агроөнөр жай комплексин кредиттөө» (КАПК) программасынын алкагында ишке ашырылып жатат, бул заманбап технологияларды киргизүүгө жана эл аралык стандарттарга шайкеш келүүгө мүмкүндүк берет. Тегирмен биринчи кезекте Жайыл жана Панфилов райондорунда өстүрүлгөн ата мекендик данды, ошондой эле сырттан ташылган чийки затты пайдаланып, үзгүлтүксүз иштешин жана жергиликтүү дыйкандарга колдоо көрсөтөт.

2025-жылдын биринчи жарым жылдыгынын маалыматы боюнча Кыргызстандын ИДПсы 711,18 миллиард сомду түзүп, өткөн жылдын ушул мезгилине салыштырмалуу 11,7%га өстү. Экономикага айыл чарба тармагы жана кайра иштетүү өнөр жайы чоң салым кошууда. Алсак, тамак-аш өнөр жай ишканалары январь-июнь айларында 48 миллиард сомдон ашык продукция өндүрүп, физикалык көлөмдүн индекси 144% түздү. Атап айтканда, ун чыгаруучу тармагы жогорку динамика-ны керсетту: биринчи беш айда 3,9 миллиард сомго 215 миц тоннадан ашык дан кайра иштетилди.

Жаңы комплекстин ишке кириши менен салыктын түшүүсү жылына 14 миллион сомдон 40 миллион сомго чейин, ал эми социалдык төлөмдөр 2 миллион сомго чейин көбөйөт. Мультипликатордук эффект күтүлөт: логистиканы, таңгактарды, сооданы өнүктүрүү, жумуштуулуктун өсүшү жана аймактын инвестициялык жагымдуулугу.

«Орион-Экстра» ун комбинаты өлкөнүн туруктуу өнүгүүсү үчүн мамлекеттин, бизнестин жана фермерлердин ийгиликтүү өз ара аракеттенүүсүнүн үлгүсү болуп калат.