Бишкек шаардык кеңешинин «Эмгек» фракциясынын лидери, КР ИСКА кикбоксинг федерациясынын биринчи вице-президенти Жаныбек Асанбеков «Патриот» төш белгисин Кыргызстандын ISKA уюмунун вице-президенти менен федерациянын АКШдагы расмий өкүлү Эдил Касеновго тапшырды.

Жогорку сыйлык спортту өнүктүрүүгө кошкон өзгөчө салымы жана чет өлкөдөгү кыргызстандык мекендештерге жигердүү колдоо көрсөткөндүгү үчүн тапшырылды. Эдил Касенов көп жылдан бери АКШда жашап, кайрымдуулук долбоорлоруна катышып, Америкага келген кыргызстандыктарга жардам берип келет.

Кошумчалай кетсек, Кыргызстандын делегациясы 17-июлдан 19-июлга чейин Орландо шаарында (Флорида штаты, АКШ) өткөн ISKA АКШнын ачык согуш өнөрү боюнча чемпионатына катышты. Спортчу Алихан Исманкулов команданын курамында ийгиликтүү чыгып, бир эле учурда эки медаль утуп алды:

• MMA-Light дисциплинасында алтын,
• Light-Contact боюнча коло (57 кг чейинки салмак категориясы).

Спортчунун ийгилиги анын жеке машыктыруучусу Майрамбек Дүйшеевдин жетекчилиги астында берилген машыгуунун натыйжасы болду.