O‘zbekistonning Qohiradagi elchixonasi ko‘magida O‘zbekistonning “Agro Gold Premium” kompaniyasi va Misrning “EFC Plants Tissue Culture SAE” korxonasi o‘rtasida onlayn muzokaralar o‘tkazildi. Tomonlar CARA navli saralangan kartoshka urug‘ini yetkazib berish bo‘yicha hamkorlik tafsilotlarini muhokama qildi.

Dastlabki bosqichda Misr tomoni O‘zbekistonga G0 avlodiga mansub 500 ming dona mini-tubuklarni tekinga yetkazib beradi. Bu urug‘lar joriy yilda Qashqadaryo viloyatida maxsus tayyorlangan maydonga ekiladi. Kelgusida ekin maydonlarini kengaytirib, olingan hosilni mahalliy dehqonlar o‘rtasida keng ko‘lamda taqsimlash rejalashtirilgan.

Loyiha Prezident Shavkat Mirziyoyevning iyun oyida Qashqadaryoga tashrifi yakunlari bo‘yicha bergan topshiriqlari doirasida amalga oshirilmoqda. Shu bilan birga, viloyat delegatsiyasi Misrda bo‘lib, kartoshkachilik sohasida hamkorlik to‘g‘risida memorandum imzoladi.