2025-жылдын 21-июль күнү саат 14:30дар чамасында Түп районунун аймагында Ысык-Көлдүн Кичи Өрүктү айылына жакын жердеги пляжда катуу шамалдын жана толкундун таасири астында белгисиз аялды байдарка (рафтинг) менен алып кеткендиги тууралуу маалымат түшкөн.

Сигнал алгандан кийин дароо окуя болгон жерге Түп РИИБнин жана Ысык-Көл ОИИБнин Туристтик жана экологиялык милициясынын кызматкерлери ыкчам түрдө жөнөп кетишти. Аба ырайынын начардыгына жана бийиктиги 1,5 метрге жеткен толкундарга карабастан кызматкерлер окуя болгон жерге барып, куткаруу иштерин уюштурушту.

Натыйжада жээктен 2-3 чакырым алыстыкка алып кеткен аял ийгиликтүү куткарылды. Куткарылган аял кызыл түстөгү кийим жана куткаруучу жилет кийген. Кийинчерээк ал Чүй облусунун Ысык-Ата районунун тургуну экени аныкталган – Т.

Куткарылган аял жээкке чыгарылып, коопсуз абалда туугандарына өткөрүлүп берилди.

Ысык-Көл облусунун ички иштер башкармалыгы жарандарды сууда эс алууда, өзгөчө шамалдуу аба ырайында коопсуздук эрежелерин так сактоого чакырат. Аба ырайынын жагымсыз шарттарында байдарка жана кайык сыяктуу чакан кемелер менен сууга чыгууга тыюу салууга өзгөчө көңүл буруу сунушталат.