Ўзбекистон Республикаси Президенти Шавкат Мирзиёевнинг таклифига биноан 2024 йил 18-19 июль кунлари Қирғизистон Республикаси Президенти Садир Жапаров Давлат ташрифи билан мамлакатда бўлади. Бу ҳақда Қирғизистон Республикаси Президенти маъмуриятининг ташқи сиёсат бошқармаси бошлиғи Муратбек Азимбакиев маълум қилди.

Президент Садир Жапаров Ўзбекистон Президенти Шавкат Мирзиёев билан музокаралар ўтказади. Томонлар икки томонлама ҳамкорликнинг долзарб масалалари ва Қирғизистон-Ўзбекистон муносабатларини ривожлантириш истиқболларини муҳокама қиладилар.

Давлат раҳбари Ўзбекистонда Қирғизистон Республикаси маданияти кунларининг расмий очилиш маросимида иштирок этади.

Шунингдек, икки давлат раҳбарлари иштирокида амалга оширилаётган икки томонлама лойиҳаларнинг онлайн тарзда ишга туширилиши ва очилиш маросими бўлиб ўтади.

Ташриф доирасида иқтисодий ҳамкорликни мустаҳкамлашга қаратилган Қирғизистон-Ўзбекистон бизнес-форуми бўлиб ўтади.

Бундан ташқари, Қирғизистон Республикаси ва Ўзбекистон олий ўқув юртлари ректорлари форуми бўлиб ўтади ва бу мамлакатлар ўртасидаги таълим алоқаларини ривожлантиришга хизмат қилади.

Сурат: Қирғизистон Республикаси Президентининг матбуот хизмати