Түрк тараптын чакыруусу менен палата мүчөлөрүнүн кезектеги отчеттук жыйынынын алкагында Кыргыз Республикасынын Түркия Республикасындагы элчиси Руслан Казакбаев Малатья облусунун Соода-өнөр жай палатасынын президенти Огузан Ата Садикоглу менен жолугушту. Иш-чаранын жүрүшүндө тараптар айыл чарба, жеңил өнөр жай, жашыл энергетика ж.б. тармактардагы өз ара аракеттенүүгө өзгөчө көңүл буруп, эки өлкөнүн соода-экономикалык кызматташтыгын чыңдоонун келечегин талкуулашты.

Элчи Р.Казакбаев презентация жасап, ишкерлерди Кыргызстанда бизнес жүргүзүүнүн артыкчылыктары, атап айтканда, инвесторлорду мамлекеттик колдоо, өлкөнүн стратегиялык жайгашуусу, жагымдуу инвестициялык климат жана ЕАЭБ рыногуна салыксыз кирүү мүмкүнчүлүгү менен кеңири тааныштырды. Ошондой эле түрк тарапка Кыргызстандан өрүктү ташып келүү жана биргелешип кайра иштетүү боюнча долбоорлор сунушталды.

Өз кезегинде Соода-өнөр жай палатасынын президенти О.Садикоглу кыргызстандык өнөктөштөр менен кызматташууга кызыкдар экенин белгилеп, бизнес байланыштарды чыңдоого багытталган демилгелерди колдоого даяр экенин билдирди.

Мындан тышкары, элчи Малатья облусунун уюшкан өнөр жай зонасына (ОИЗ) барып, анда бир катар ишканалардын ишмердүүлүгү менен таанышты жана бизнес чөйрөсүнүн өкүлдөрү менен соода-экономикалык кызматташуу мүмкүнчүлүктөрүн, ошондой эле кыргыз экономикасынын түрдүү тармактарына түрк инвестицияларын тартуунун келечегин талкуулады.

Элчи Р.Казакбаев жумушчу сапарынын алкагында ошондой эле Малатья технопаркында ишке ашырылып жаткан инновациялык долбоорлор жана стартаптар менен таанышып, илим, технология жана инновация тармагында кызматташуунун келечегин, анын ичинде Кыргызстан менен Түркиянын технопарктарынын ортосунда түз байланыштарды түзүү мүмкүнчүлүгүн талкуулады.

Иш сапардын жыйынтыгында Баткен жана Малатия шаарларынын ортосундагы бир тууган шаар мамилелерин эске алуу менен жакынкы аралыкта Малатиядан Кыргызстанга, анын ичинде Баткен облусуна бизнес делегациясынын иш сапарын уюштуруу боюнча макулдашууга жетишилди.

Булак: caravan-info.uz

04.08.2025 19:11:23