Душанбе, 6-август, – Караван инфо маалымат агенттиги.Тажикстандын айыл чарба министри Курбон Хакимзода менен Кытайдын айыл чарба министринин орун басары Чжан Чжилинин жолугушуусунда асыл тукум топоздорду ташып келүүнү уюштуруу маселеси талкууланды. Бул бийик тоолуу жаныбарлар Памирдин катаал климатына эң сонун ыңгайлашып гана тим болбостон, жергиликтүү малдын генетикалык фондун чыңдоого, продуктуулугун жогорулатууга жана илдеттерге туруштук берүүгө жардам бере алат.

Тараптар ошондой эле Кытайдын аймагын Монголиядан топоз алып келүү үчүн транзиттик аймак катары пайдалануу мүмкүнчүлүгүнө да токтолушту. Бул долбоордун кеңейген географиялык чөйрөсүнөн кабар берет жана аймактын айыл чарба чынжырларына интеграциялоо үчүн жаңы перспективаларды ачат.

Диалогдо ошондой эле Тажикстандын агро-экспорттук мүмкүнчүлүктөрү талкууланды. Кытай делегациясы Тажикстандан лимон, алча, жүзүм жана кургатылган тыт алып келүүгө кызыкдар экенин билдирди. Бул өлкөнүн экспорттук потенциалын өнүктүрүүнүн жана фермерлер үчүн сатуу рынокторун диверсификациялоонун жаңы этабы болуп калышы мүмкүн.

Тараптар айыл чарба технологияларын өнүктүрүүгө өзгөчө көңүл бурушту. Кытай Тажикстанда ШКУнун Инновациялык айыл чарба технологияларын көрсөтүү борборун түзүүнү сунуштады.

Мындай борбор илимий иштелмелерди алмашуунун, дыйкандарды окутуунун, агротехниканын алдыцкы методдорун киргизуунун аянтчасы боло алмак.

Аракеттерди координациялоо жана сөздөн ишке өтүү үчүн Тажикстан менен Кытайдын ортосундагы айыл чарба боюнча түзүлгөн подкомитеттин алкагында атайын жумушчу топ түзүү сунушталды. Анын милдеттерине приоритеттүү багыттар боюнча конкреттүү долбоорлорду иштеп чыгуу кирет: селекция, үрөнчүлүк, пахтачылык, өсүмдүктөрдү коргоо, зыянкечтерге жана илдеттерге каршы күрөшүү, ошондой эле өсүмдүк өстүрүүчүлүккө жана топурак таанууга заманбап технологияларды киргизүү.

Асыл тукум топоздор менен камсыз кылуу Тажикстан менен Кытайдын айыл чарба системаларын жакындатуу процессинин көрүнүктүү бөлүгү гана. Мунун артында туруктуу өнүгүүгө, технологиялык жаңыланууга жана азык-түлүк коопсуздугуна багытталган узак мөөнөттүү кызыкчылыктар турат. Климаттык чакырыктар жана глобалдык атаандаштык доорунда мындай өнөктөштүк өзгөчө актуалдуу болуп баратат.

СУРОТТв: ачык булактардан