Кыргыз Республикасынын Суу чарба, айыл чарба жана кайра иштетүү өнөр жай министрлигине караштуу Жер жана суу ресурстарын пайдаланууну көзөмөлдөө кызматы тарабынан 2025-жылдын биринчи жарым жылдыгында жер-суу мамилелери жаатында 852 текшерүү жүргүзүлүп, жыйынтыгында 1053 мыйзам бузуу аныкталган.

380 адам жоопкерчиликке тартылып, жалпысынан 4 миллион 496 миң сом айып салынган. Мындан тышкары, жерге келтирилген зыян үчүн коюлган доолордун суммасы 34 999 200 сомду түзгөн.

Кызмат республиканын аймагындагы жер участокторунун максаттуу пайдаланылышына системалуу мониторингди жана текшерүүлөрдү жүргүзөт. Учурда бул иш-чаралар күчөтүлүп, мыйзамсыз пайдаланылган же пайдаланылбай жаткан жерлер активдүү аныкталып, тиешелүү чаралар көрүлүүдө.

Түндүк айланма жолдун боюнда 27 гектарга жакын айыл чарба жерлери өз багытында пайдаланылбай жатканы аныкталган. Мыйзам бузуу аныкталса, бузууну жоюу жана жерди баштапкы абалына келтирүү боюнча 30 күндүк мөөнөт менен жазуу жүзүндөгү буйрук чыгарылат.

Кыргыз Республикасынын “Укук бузуулар жөнүндө” кодексинин беренелерине ылайык, тартип бузгандарга айып пул салынат. Жазуу жүзүндөгү буйруктар белгиленген мөөнөттө аткарылбаган учурда өз багыты боюнча пайдаланылбаган жер участоктору мамлекеттин менчигине өткөрүлөт. Материалдар мыйзам чегинде чара көрүү үчүн сот органдарына жана тиешелүү мамлекеттик түзүмдөргө жиберилет.

Бул чаралар жер ресурстарын үнөмдүү пайдаланууга, мыйзам бузуулардын алдын алууга, жер-суу мыйзамдарын сактоого, өлкөнүн азык-түлүк коопсуздугун камсыз кылууга багытталган.

Булак: caravan-info.uz