КР Эмгек, социалдык коргоо жана миграция министрлиги улгайган жарандарды колдоо жаатындагы жетишкендиктер жана пландар тууралуу айтып берди. Мамлекеттик саясат улгайган адамдардын укуктарын кепилдеген мыйзамдарга негизделет жана медициналык-социалдык кызматтардын сапатын жогорулатууга багытталган.

Бүгүнкү күндө Кыргызстанда 408 миңден ашык улгайган жарандар жашайт, алардын үлүшү өсүп жатат, бул социалдык саясатты адаптациялоону талап кылат. Өлкөдө карылар жана майыптар үчүн 17 социалдык интернаттык мекемелер бар, 880ден ашык социалдык кызматкерлер үйүндө кам көрүшөт.

Эмгек министрлиги жыл сайын карылар жана майыптар үчүн коомдук пайдалуу долбоорлорду колдойт, ошондой эле тоскоолдуксуз чөйрөнү түзүүгө багытталган «Жеткиликтүү өлкө» мамлекеттик программасын ишке ашырат. 2025-2030-жылдарга жигердүү узак жашоонун мамлекеттик программасынын долбоору иштелип чыкты, анда негизги артыкчылыктар: ден соолук, татыктуу жашоо жана улгайган адамдардын коомго активдүү катышуусу белгиленген.

Саламаттыкты сактоодо улгайган жарандарга бекер медициналык жардам көрсөтүлүп, “Ардагер” геронтологиялык борбору иштейт.

Жыл сайын активдүү карылыкты колдоого жана жайылтууга багытталган “Карыларга көңүл буруу жана камкордук” айлыгы жана “Жүрөктөн жүрөккө” жарманкеси өткөрүлөт.

Кыргызстандын мамлекеттик саясаты улгайган адамдардын зарыл колдоо жана урмат-сый менен татыктуу жана активдүү жашоосу үчүн шарттарды түзүүгө багытталган.

11.08.2025 11:22:58