5-сентябрда Кыргыз Республикасынын Президенти Садыр Жапаров «Улан» балдардын ден соолук борборунун абалы менен таанышып, Ысык-Көл районунун Тору-Айгыр айылында Мамлекеттик ипотекалык компаниянын 10 жылдыгына арналган салтанаттуу иш-чарага катышты.

Мамлекет башчысы оңдоп-түзөөдөн өткөн жатакана менен ашкананы, курулган коттедждерди көрүп чыкты.

1969-жылдан бери ден соолукту чыңдоо борбору жай мезгилинде гана иштеп, өлкөнүн бардык аймактарынан балдарды кабыл алат.

Садыр Жапаров белгилегендей, бул борбор бир кезде өлкөдөгү алдыңкы балдар лагерлеринин бири болгон. Бирок, мамлекеттин карамагындагы көптөгөн саламаттыкты сактоо мекемелериндей эле, акыркы 30 жылдын ичинде кароосуз калып, рентабелдүү эмес ишканага айланган.

Мындай объектилерди калыбына келтирүү үчүн Президенттин мүлкүн башкаруу башкармалыгынын түзүмүндө атайын бөлүм – Санаторий-курорттук, ден соолукту чыңдоо жана туризм объекттерин башкаруу боюнча дирекция түзүлдү. Бул дирекция «Көгөлтүр Ысык-Көл», «Жалал-Абад», «Жети-Өгүз», «Ысык-Ата» жана «Улан» балдардын ден соолук борбору сыяктуу объектилерди башкарууга алып, аларды этап-этабы менен реконструкциялоону жана модернизациялоону баштаган.

Эми Садыр Жапаров баса белгилегендей, «Улан» жайкы лагерь эмес, жайкысын балдардын эс алуусуна, ден соолугун чыңдоого, ошондой эле жылдын калган мезгилинде спорттук лагерлерди, машыгууларды, маданий-агартуу иш-чараларын өткөрүүгө ылайыкталган заманбап ден соолукту чыңдоо борбору.

2024–2025-жылдары борбордун аймагында ири капиталдык иштер жүргүзүлгөн. Уч кабаттуу жатакана толугу менен реконструкцияланып, 17 сарай тибиндеги коттедждер жана 2 а-кабаттуу коттедждер курулду.

Борбор заманбап эмеректер жана керектүү шаймандар менен жабдылган, спорт аянтчалары, кичи футбол, волейбол жана баскетбол аянтчалары, бассейн, 700 метр чуркоо аянтчасы, теннис корттору жана балдар ойноочу аянтчалар менен жабдылган, жаңы конференц-зал курулуп, аймакты комплекстүү көрктөндүрүү иштери жүргүзүлдү.

"Тарбия, билим берүү менен катар балдарыбыздын ден соолугуна да көңүл бурушубуз керек. Бүгүн биз ачып жаткан "Улан" борбору бул камкордуктун жаркын мисалы. Бул борбор балдарыбыздын ден соолугун чыңдап, талантын ачып, дараметин ишке ашырган жайга айлансын", – деп баса белгиледи мамлекет башчысы.

Андан кийин Мамлекеттик ипотекалык компаниянын 10 жылдыгына арналган салтанаттуу иш-чара өттү.

Садыр Жапаров 10 миллион сомдук уставдык капитал менен ишин баштап, бул аралыкта көптөгөн кыйынчылыктарды башынан өткөргөнүн, бирок жеке турак жайы жок, батирлерди ижарага алууга аргасыз болгон жарандарга жеткиликтүү шарттарды түзүү аракетин улантканын эске салды.

2021-жылы “Менин үйүм 2021-2026” программасынын алкагында үч багыт пайда болгон: Социалдык ипотека, Жеңилдетилген ипотека жана Жеткиликтүү ипотека. Ишкананын эффективдүүлүгүн жогорулатуу үчүн ал президенттин мүлкүн башкаруу башкармалыгына өткөрүлүп берилди.

Садыр Жапаров буга чейин компания коммерциялык банктар менен гана өнөктөштүктө иштеп, турак-жай сатып алууну каржылап келгенин, өздүк фонддон батир бөлүштүрүүгө катышпаганын баса белгиледи. 2021-жылдан баштап компания турак жай комплекстерин кура баштады.

Биринчи этапта батирге муктаж 3251 жаранга: адегенде Бишкек шаарында, андан кийин Жалал-Абадда турак жай берилди.

Бүгүнкү күндө Мамлекеттик ипотекалык компаниянын уставдык капиталы 87,5 миллиард сомду түзөт. Ишкана бүгүнкү күндө 13 миң 850 үй-бүлөнү турак жай менен камсыз кылды.

Мамлекеттик турак-жай программасынын алкагында учурда 100 миңге жакын жаран кезегин күтүп жатат.

"Бул биздин жеткиликтүү турак-жай менен камсыз кылуу боюнча программабыз ийгиликтүү ишке ашып жатканын билдирет. Бул дагы элдин бийликке болгон ишеними өсүп жатканын тастыктайт. Өзгөчө белгилегим келет, бүгүнкү күндө жарандардын турак-жай маселесин чечүү үчүн 70 миңден ашык батирлер курулуп жатат", – деди президент.

Ошондой эле бүгүнкү иш-чара Мамлекеттик ипотекалык компаниянын 10 жылдык мааракеси гана эмес, ар бир жаранга татыктуу жана жеткиликтүү турак жайга жол ачып, жаңы доордун башталышы экенин баса белгиледи.

"Биздин алдыбызда олуттуу милдеттер турат. Биз каржылоо механизмдерин кеңейтип, үлүштүк курулушту өнүктүрүүнү көздөп жатабыз. Биз көп балалуу үй-бүлөлөргө, ден соолугунун мүмкүнчүлүктөрү чектелүү жарандарга, жаш адистерге жылдык 4% менен жана алгачкы төлөмсүз социалдык ипотеканы берүүнү максат кылып койдук. Мындай жеңилдиктер мамлекеттик жана социалдык тармактын кызматкерлерине да берилет", – деп белгиледи Садыр Жапаров.

Ал кошумчалагандай, жеткиликтүү ипотекалык насыяларды жылдык 8% менен баштапкы төлөмсүз жана жеке жактарга берүү пландары.

Сөзүнүн аягында президент Садыр Жапаров ипотекалык компаниянын кызматкерлерине, каржы мекемелерине жана курулуш компанияларына акыркы он жылда Кыргызстандын жарандарынын кызыкчылыгы үчүн биргелешип иш алып барганы үчүн ыраазычылык билдирди. Ошондой эле мамлекеттик программаларга ишенген жана аларга активдүү катышкан ар бир жаранга.