Одамларни аэропортлар ва вокзаллар атрофида тез кўчириш учун мўлжалланган электр моторли трансформатор чамадонларининг тобора оммалашиб бораётгани Япония расмийларини хавотирга солди. Бундай чамадонларда кўчаларда эркин сайр қилиш мумкин бўлган чет эллик меҳмонлар уларни Япониядаги жамоат йўлларида ишлатишади. Бироқ, бу ерда чамадонлар «моторли велосипедлар» тоифасига киради ва рўйхатдан ўтиш, ҳайдовчилик гувоҳномаси ва хавфсизлик ускуналарини талаб қилади.

Шу йилнинг июнь ойида полиция Осака кўчаларида уч ғилдиракли чамадон минаётган хитойлик аёлни ҳибсга олди. Унинг лицензиясиз ҳайдаш бўйича иши прокуратурага етиб борган биринчи ҳолат эди.

Шунингдек июль ойи бошида, Индонезиялик бир бола Осаканинг серқатнов  тижорат кварталларидан бири бўлган Дотонборида бир оломон пиёдалар орасидан чамадонни миниб ўтган. Унинг ота-онаси у йўл қоидаларини бузганлигини эшитиб ҳайратда қолишди, чунки уларнинг мамлакатида бундай усулда ҳар қандай жойда юриш мумкин.

Электр чамадонлар ўрнатилган аккумулятор ва электр моторига эга ва соатига 10 километр тезликка эриша олади. Улар нисбатан арзон ва қулай – ва кўплаб Осиё мамлакатларида машҳур. Япониянинг иккита йирик аэропорти йўловчилардан ўз ҳудудларида электромобиллардан фойдаланмасликни сўради ва полиция маҳаллий чакана сотувчилар ва савдогарларни харидорларни йўл ҳаракати қоидалари ҳақида огоҳлантиришга чақирмоқда.

Tранспорт соҳасидаги мутахассислар ҳам муаммони пайқашди. «Янги ва кутилмаган транспорт турлари пайдо бўлишда давом этмоқда», – деди Такеру Сибаяма, Вена технология университети Tранспорт институти катта илмий ходими. Унинг қўшимча қилишича, Японияда «моторли велосипедлар» тоифасига кирадиган транспорт воситаларининг ассортиментини ҳисобга олган ҳолда, электр чамадонлар билан ишлаш учун янги тасниф яратиш ҳақида ўйлаш керак.

Сурат: Kyodo News