Еуразиялық экономикалық одақ елдерінде 2024 жылдың соңына қарай 6,6 миллион контрафактілік тауар анықталды. Зияткерлік меншік саласында 1465 заң бұзушылық тіркелді. Бұл деректер ЕЭК Алқасы жанындағы Зияткерлік меншік жөніндегі консультативтік комитеттің отырысында ұсынылған 2024 жылға арналған ЕАЭО елдеріндегі зияткерлік меншік құқықтарын қорғау саласындағы құқық қолдану тәжірибесінің мониторингі туралы есепте көрсетілген.

ЕЭК Экономика және қаржы саясаты министрі Бақыт Сұлтанов атап өткендей, жаппай сұранысқа ие тауарлар көбінесе контрафактілік болып табылады.

"Антирейтингті күнделікті тауарлар: киім-кешек пен аяқ киім, тұрмыстық техника, автокөлік бөлшектері, сондай-ақ парфюмерия мен косметика басқарды. Бұл тәртіп бұзушыларға ең осал санаттар", — деді ЕЭК Министрі.

Кездесуге қатысушылар ЕАЭО аясындағы зияткерлік меншік саласындағы негізгі бастамаларды талқылады. Интернет желісіндегі бұзушылықтардың алдын алудың келісілген тәсілдерін әзірлеуге және өнеркәсіптік меншік объектілерін тексеру бойынша іздеу қызметін құруға басты назар аударылды.

Бұл шаралар Еуразиялық экономикалық интеграцияны дамытудың 2025 жылға дейінгі Стратегиялық бағыттарын іске асыру жоспарының бір бөлігі болып табылады және бизнес пен тұтынушылар үшін қауіпсіз және ашық ортаны құруға бағытталған.

Сондай-ақ зияткерлік меншік объектілерінің бірыңғай кедендік тізілімін іске қосу және ЕАЭО-да тауар таңбалары мен тауар шығарылған жерлердің атауларын тіркеу жүйесін енгізу мәселелері талқыланды.

Сонымен қатар, кеден органдары мен авторлық құқық иеленушілер арасында электрондық ақпарат алмасуды ұйымдастыру және авторлық және сабақтас құқықтарды ұжымдық негізде басқару тәртібі туралы келісімге өзгерістер енгізу мүмкіндігі қарастырылды.

11.09.2025 06:31:01