МОСКВА, 15-сентябрь, 2025-жыл.Орус энергетикалык компаниялардын Ирак экономикасына салган инвестициясы 20 миллиард доллардан ашты. Бул тууралуу Орусиянын Коопсуздук кеңешинин катчысы Сергей Шойгу Багдадга иш сапарынын алдында билдирди.

Анын айтымында, Москва мындан ары биргелешкен мунай, газ жана инфраструктуралык долбоорлорду өнүктүрүүгө ниеттенүүдө.

Ошол эле учурда жалпы соода жүгүртүү да өсүүдө: өткөн жылы ал 30%га өскөн, ал эми 2025-жылдын биринчи жарымында дагы 35% кошулган. "Бул позитивдүү динамика туруктуу болушу маанилүү", – деп баса белгиледи Шойгу.

Ал белгилегендей, Ирак Орусиянын араб дүйнөсүндөгү жана эл аралык аренадагы негизги өнөктөштөрүнүн бири бойдон калууда. Быйыл Багдад Араб мамлекеттеринин лигасына төрагалык кылууда жана анын Жакынкы Чыгыштагы ролун, Шойгунун айтымында, “ашыкча баалоо кыйын”.

Коопсуздук кеңешинин катчысы ошондой эле эки тараптуу диалог бардык тармактарда, анын ичинде эки өлкөнүн коопсуздук кеңештеринин өз ара аракеттенүүсү боюнча жүргүзүлүп жатканын билдирди.

Орусия Ирак менен мунай жана газ тармагында активдүү кызматташат. Өлкөдө мунай жана газ өндүрүү, куурларды куруу жана энергетикалык инфраструктура боюнча долбоорлорду ишке ашыруучу ири орусиялык компаниялар иштеп жатат.

Ирак өз кезегинде Жакынкы Чыгыштагы маанилүү оюнчу бойдон калууда жана дүйнөнүн алдыңкы державалары менен өнөктөштүктү тең салмактоого умтулат.

Сүрөт:Ачык булактар