2025-жылдын 8-сентябрында Кыргыз Республикасынын Индия Республикасындагы Атайын жана Ыйгарым укуктуу Элчиси Аскар Бешимов менен Wingspan Group компаниясынын төрагасы жана башкаруучу директору Неерадж Ратинин жолугушуусу болуп өттү.

Сүйлөшүүнүн жүрүшүндө жарандык авиация тармагындагы кызматташуунун келечеги, анын ичинде Кыргыз Республикасы менен Индия Республикасынын ортосундагы аба каттамдарын өнүктүрүү, индиялык туристтерди тартуу, ишкердик байланыштар үчүн мүмкүнчүлүктөрдү кеңейтүү талкууланды.

Тараптар эки өлкөнүн ортосундагы туризмди, инвестициялык кызматташтыкты жана гуманитардык байланыштарды өнүктүрүүгө көмөктөшүүчү транспорттук байланыштарды чыңдоого өз ара кызыкдар экенин ырасташты.

Элчи А.Бешимов бизнес жана маданий алакаларды жандандыруу үчүн түз авиакаттамдарды кеңейтүүнүн маанилүүлүгүн белгиледи. Өз кезегинде Н.Рати Кыргыз Республикасынын туристтик жана транзиттик багыт катары жогорку потенциалын белгилеп, кыргыз тарап менен мындан аркы кызматташууга даяр экендигин билдирди.

Жолугушуунун жыйынтыгында тараптар кызматташтыкты өнүктүрүү боюнча практикалык кадамдарды алга жылдыруу ниетин билдиришти.

Маалымат үчүн:1998-жылы Индияда негизделген, Wingspan Group учурда жарандык авиация кызматтарын, анын ичинде билеттерди сатуу, чартердик каттамдарды башкаруу, жүк ташуу жана авиакомпаниялардын маркетингин колдоо боюнча ири провайдерлердин бири болуп саналат. Топ IndiGo сыяктуу алдыңкы авиакомпаниялардын расмий өнөктөшү болуп саналат.