FIFA Club Benefits Program (CBP) doirasidagi to'lovlar rekord darajada oshganini e'lon qildi. 2026 yilgi jahon chempionatida o'z futbolchilarining ishtiroki uchun jami 355 million dollar butun dunyo bo'ylab klublar o'rtasida taqsimlanadi. Bu mablag' JCh-2022 uchun ajratilgan 209 million dollardan 70 foizga ko'p. Taqqoslash uchun, 2018-yilda Rossiyaning 416 klubi o‘rtasida 209 million dollar, 2014-yilda Braziliyada 70 million dollar, kompensatsiya dasturi ilk bor amalga oshirilgan 2010-yilda Janubiy Afrikada 40 million dollar taqsimlangan. Asosiy o‘zgarish shundan iboratki, endi to‘lovlar nafaqat final turniriga o‘yinchilarni qo‘yib yuborgan, balki futbolchilari saralash o‘yinlarida ishtirok etgan klublarga ham to‘lanadi. Bu FIFA va Yevropa klublar assotsiatsiyasi (ECA) o‘rtasida 2023-yilda yangilangan o‘zaro anglashuv memorandumi imzolanganidan so‘ng mumkin bo‘ldi.O‘zbekiston uchun bu qaror tarixiy ahamiyatga ega: milliy terma jamoa birinchi marta jahon chempionatida ishtirok etadi. Shu tariqa, O‘zbekiston klublari birinchi marta terma jamoaga chaqirilgan futbolchilar uchun FIFAdan to‘g‘ridan-to‘g‘ri tovon puli oladi. Eslatib o‘tamiz, JCh-2026 11 iyundan 19 iyulga qadar AQSH, Kanada va Meksikada bo‘lib o‘tadi. Turnirda birinchi marta odatdagidek 32 ta emas, 48 ta jamoa ishtirok etadi.